Իրանի հետ պատերազմից հետո՝ ԱՄՆ-ն կվերանայի հարաբերությունները ՆԱՏՕ-ի հետ. Ռուբիո

ԱՄՆ պետքարտուղար Մարկո Ռուբիոն G7 երկրների գործընկերների հետ բանակցությունների ընթացքում առաջարկել է նրանց մասնակցել Հորմուզի նեղուցում անվտանգության միջազգային նախաձեռնությանը՝ Իրանի հետ հնարավոր ռազմական գործողությունների ավարտից հետո։ Այս մասին հաղորդում է Axios-ը՝ հղում անելով իր աղբյուրներին։ 

Աղբյուրի փոխանցմամբ՝ Ռուբիոն ընդգծել է, որ Միացյալ Նահանգներին անհրաժեշտ չէ գործընկերների աջակցությունը նեղուցի բացման համար, սակայն Վաշինգտոնը շահագրգռված է, որ G7 երկրները միանան միջազգային ծովային կոալիցիային հետագա փուլում։

Նշվում է, որ խոսքը վերաբերում է ինչպես նավերի ուղեկցման, այնպես էլ տարածաշրջանում միջազգային ներկայության ապահովման հնարավորություններին։ Այդ քայլը, ըստ ամերիկյան կողմի, պետք է ցույց տա, որ Հորմուզի նեղուցը չի գտնվում Իրանի լիակատար վերահսկողության ներքո։

Նա նաև նշել է, որ ԱՄՆ-ն կվերանայի իր հարաբերությունները Հյուսիսատլանտյան դաշինքի հետ Իրանի հետ պատերազմից հետո։

«ՆԱՏՕ-ն օգտակար է Վաշինգտոնի համար, քանի որ թույլ է տալիս նրան զինվորներ և ռազմական տեխնիկա տեղակայել Միացյալ Նահանգների սահմաններից դուրս, բայց եթե դաշինքը սահմանափակվում է միայն նրանով, որ Միացյալ Նահանգները պաշտպանում է Եվրոպային, իսկ վերջինս անհրաժեշտության դեպքում մերժում է Վաշինգտոնին բազաների օգտագործման հարցում, ապա դա լավ համաձայնություն չէ»,- ասել է Ռուբիոն: