ԱԺ-ի մոտ միջադեպի վերաբերյալ խուլիգանության հատկանիշներով վարույթ է նախաձեռնվել

44 օրյա պատերազմի հանգամանքները ուսումնասիրող քննիչ հանձնաժողովի զեկույցի հրապարակման պահանջի նախաձեռնությունը կարգավորող Միքայել Մարգարյանի նկատմամբ քրեական վարույթ է նախաձեռնվել՝ «խուլիգանության» հատկանիշներով։ Այս մասին Auroranews-ին հայտնեցին Քննչական կոմիտեից:

ՆԳՆ ոստիկանությունից ստացված հաղորդման համաձայն՝ Միքայել Մարգարյանը, տեղեկատվական և հաղորդակցական տեխնոլոգիաներն օգտագործելով, ուղիղ եթերով՝ իրականացրել է խուլիգանական գործողություններ, մասնավորապես՝ հասարակության նկատմամբ բացահայտ անհարգալից և բարոյական նորմերի նկատմամբ բացահայտ արհամարհական վերաբերմունք դրսևորելով հայհոյանք և անպարկեշտ արտահայտություններ է հնչեցրել։

«Հաղորդման հիման վրա նախաձեռնվել է քրեական վարույթ՝ Քրեական օրենսգրքի 297-րդ հոդվածի 2-րդ մասի 3-րդ կետով (տեղեկատվական կամ հաղորդակցական տեխնոլոգիաներն օգտագործելով խուլիգանություն կատարելը): Կատարվում է նախաքննություն», - նշված է հաղորդագրության մեջ:

Հիշեցնենք, որ մարտի 26-ին Ազգային ժողովի դիմաց ստեղծված լարված իրավիճակից հետո Դեմիրճյան փողոցից 2 անձ էր ձերբակալվել։