271 տոննա բեռով վագոններն Ադրբեջանից ուղևորվեցին Հայաստան

Ռուսաստանից Հայաստան բեռների ևս մեկ խմբաքանակ է տեղափոխվել Ադրբեջանի տարածքով։ Այս մասին տեղեկանում ենք Ադրբեջանական լրատվամիջոցներից։

«Մարտի 24-ին Բիլյաջարի կայարանից Բոյուկ Քեսիկ կայարան են ուղարկվել պարարտանյութով լի չորս վագոն՝ ընդհանուր 271 տոննա քաշով և հնդկացորենով լի մեկ վագոն՝ 68 կիլոգրամ քաշով»,- հայտնում են տեղի լրատվամիջոցները։

Նշվում է, որ փետրվարի 25-ին Ադրբեջանից Հայաստան է ուղարկվել 4500 տոննա դիզելային վառելիք, մարտի 5-ին՝ 31 վագոն՝ 1984 տոննա դիզելային վառելիքով և երկու վագոն՝ 135 տոննա ռուսական պարարտանյութերով, մարտի 9-ին՝ 7 վագոնից բաղկացած բեռնատար գնացք՝ ռուսական հացահատիկով, մարտի 11-ին՝ 1023 տոննա ընդհանուր քաշով հացահատիկ։ Մարտի 19-ին Ռուսաստանից ուղարկվել է 7 երկաթուղային վագոն՝ հացահատիկով, որի ընդհանուր քաշը կազմում էր 488 տոննա։