Գալյանը՝ Փաշինյանի հայտարարությունների մասին

Իրավական մասն ամբողջությամբ պատրաստ է, իսկ այս պահին մշակվում է քաղաքական համատեքստը, և աշխատանքները շարունակվելու են խորհրդի հետ, որպեսզի չմնան չքննարկված հարցեր։ Ինչպես նշել է Ազգային ժողովում ճեպազրույցի ընթացքում Արդարադատության նախարար Սրբուհի Գալյանը՝ անդրադառնալով նոր Սահմանադրությանը, գործընթացը ստատիկ չէ, և չի լինելու այնպես, որ տեքստը հրապարակվի և դրանով ավարտվի։

«Մենք տեքստ կամ դրույթներ հրապարակելու ենք, որպեսզի հանրության զգացողությունները շոշափենք ու անդրադարձ ունենանք, այսինքն՝ կարծիքներ հավաքենք, փոփոխենք, և դրանք նույնպես քննարկվելու են խորհրդի հետ: Սա դինամիկ գործընթաց է, հրապարակումը չի նշանակելու, որ աշխատանքներն այդ կետում ավարտվում են, նշանակում է հակառակը՝ աշխատանքները նոր տեմպով շարունակվելու են»,-ասել է նա։

Անդրադառնալով դիտարկմանը, թե վարչապետ Նիկոլ Փաշինյանի հայտարարությունը՝ ըստ որի իրենք կողմ են, որ Սահմանադրության մեջ անդրադարձ չլինի Անկախության հռչակագրին, չի՞ ազդում խորհրդի կարծիքի վրա, նախարարը պատասխանել է.

«Թող չազդվեն: Արվում են քաղաքական հայտարարություններ, վարչապետը քաղաքական պաշտոն զբաղեցնող անձ է, իրավունք ունի հայտարարել այն, ինչ ճիշտ է գտնում, խորհրդի անդամները խորհրդի անդամներն են, իրավունք ունեն հայտնել իրենց կարծիքը, այդ թվում՝ հրապարակայնորեն»,- նշել է նա։