Նեթանյահուն հայտարարություն է արել․ մենք ջախջախում ենք

Իսրայելը շարունակում է հարվածներ հասցնել Իրանի և Լիբանանի թիրախներին՝ հայտարարել է Իսրայելի վարչապետ Բենիամին Նեթանյահուն: Նա նաև նշել է, որ հեռախոսազրույց է ունեցել ԱՄՆ նախագահ Դոնալդ Թրամփի հետ՝ քննարկելով Իրանի հետ հնարավոր համաձայնագրի հարցը։ Այս մասին տեղեկացնում է Ynet-ը։ 

«Մենք ջախջախում ենք Իրանի հրթիռային և միջուկային ծրագիրը և շարունակում ենք լուրջ վնաս հասցնել «Հըզբոլլահին»,- ասել է Նեթանյահուն:

Նեթանյահուի խոսքով՝ Թրամփը կարծում է, որ Իսրայելի պաշտպանության բանակի և ԱՄՆ զինված ուժերի գործողությունների արդյունքում ձեռք բերված արդյունքները կարող են օգտագործվել ռազմական նպատակները ամրագրելու համար՝ համաձայնագրի շրջանակում, որը կպաշտպանի Իսրայելի ռազմավարական շահերը։

Միաժամանակ Իսրայելի վարչապետը նշել է, որ ռազմական գործողությունները շարունակվում են, և իսրայելական ուժերը շարունակելու են հարվածներ հասցնել Իրանին և Լիբանանին։

Նրա խոսքով՝ մի քանի օր առաջ իրականացված գործողությունների ընթացքում սպանվել են Իրանի միջուկային ծրագրի հետ առնչություն ունեցող երկու գիտնականներ։