Հայաստանն ու Թուրքիան քննարկում են փոխադարձ կրթաթոշակների հնարավորությունը. Միրզոյան

Հայաստանի և Թուրքիայի միջև քննարկվում է երկու երկրների բուհերում միմյանց ուսանողների համար կրթաթոշակների սահմանման հնարավորությունը։ Այս մասին Ազգային ժողովի արտաքին հարաբերությունների հանձնաժողովի նիստում հայտարարել է ՀՀ ԱԳ նախարար Արարատ Միրզոյանը՝ ներկայացնելով ԱԳՆ 2025 թվականի գործունեության զեկույցը։

Նախարարը նշել է, որ այս փուլում Հայաստանը և Թուրքիան ունեն բավականին ակտիվ, դինամիկ և խոստումնալից երկխոսություն։

Արարատ Միրզոյանը հիշեցրել է, որ Երևանի և Անկարայի միջև արդեն գոյություն ունեն հստակ պայմանավորվածություններ, որոնց իրականացման ուղղությամբ կողմերը առաջ են շարժվում։

«Կողմերի միջև այժմ նույնիսկ քննարկվում է երկու երկրների բուհերում միմյանց ուսանողների համար կրթաթոշակներ սահմանելու հնարավորությունը»,- ասել է Միրզոյանը։

Նա նաև հավելել է, որ 2025 թվականին հայ և թուրք պաշտոնյաների միջև տեղի են ունեցել բազմաթիվ հանդիպումներ և շփումներ, ինչը վկայում է երկու երկրների միջև դինամիկ զարգացող երկխոսության մասին։