Ռուսերենի նկատմամբ հետաքրքրվածությունը նվազում է, շուտով մասնագետների խնդիր կունենանք. Անդրեասյան

Ռուսերենի նկատմամբ հետաքրքրվածությունը նվազում է, և ընդհանուր առմամբ ռուսերենի ուսումնասիրության բաժինների դիմելիության առումով լուրջ խնդիր կա։ Այս մասին Ազգային ժողովում ՄԻՊ հանձնաժողովի աշխատանքների ընթացքում հայտարարել է ԿԳՄՍ նախարար Ժաննա Անդրեասյանը։

Նա նշել է, որ մասնագետների պակասի հարցը շուտով կարող է զգալի դառնալ ռուսերենի ուսուցիչների շրջանում։

«Մենք ունենք հնարավորություն, որ այն առարկայական մասնագետները, որոնք պատրաստվում են Մանկավարժական համալսարանում՝ կարող են վերցնել լրացուցիչ ռուսերենի դասընթացներ և կարողանան այդ լեզվով դասավանդել: Այս հնարավորություններն ընձեռնվում են, պարզապես ուսանողները այդ ցանկությունը պետք է ունենան: Սա իրողություն է, որը նախ և առաջ պետք է տեսնել, և երկրորդը՝ ծրագրեր կան, սակայն հետաքրքրվածության նվազումն ակնհայտ է»,- նշել է նա։

Անդրադառնալով դասագրքերին՝ Ժաննա Անդրեասյանը ընդգծել է, որ դպրոցներում կարող են դասավանդել միայն ԿԳՄՍ նախարարության կողմից հաստատված դասագրքերով։

«Եթե ինչ-որ մեկը ինչ-որ տեղից դասագիրք է բերում՝ չի կարող դասավանդել ու դա ճիշտ չէ, այդպես չպետք է լինի, դասագրքերը պետք է համապատասխանեն մեր չափորոշիչներին՝ բովանդակությամբ ու տրամաբանությամբ: Կարծում եմ, որ այդտեղ մենք անելիք ունենք»,- ասել է ԿԳՄՍ նախարար Ժաննա Անդրեասյանը։