Մարթա Կոսը՝ վիզաների ազատականացման գործընթացի և ՀՀ-ին 140 մլն եվրո տրամադրելու մասին

Ես վերադարձել եմ Հայաստան իմ նախորդ այցից վեց ամիս ան։ Այս մասին ՀՀ փոխվարչապետ Մհեր Գրիգորյանի հետ հայտարարությունների ժամանակ նշել է եվրահանձնակատար Մարթա Կոսը։

Նա ընդգծել է, որ վստահ է՝ իր վերադարձը ողջունելի է, և ինքն էլ ուրախ է, քանի որ հնարավորություն ունի սեփական աչքերով տեսնելու Հայաստանում ընթացող փոխակերպման գործընթացը։

«Իմ նախորդ այցից հետո շատ բան է տեղի ունեցել, աշխարհն էլ ավելի անկայուն է դարձել և սա ևս մեկ անգամ վկայում է, թե որքան կարևոր է մեր գործընկերությունը Հարավային Կովկասում, դա ևս մեկ անգամ ընդգծում է, թե որքան կարևոր է ունենալ վստահելի գործընկերներ և բարեկամներ: Հայաստանը մենք հենց այդպես ենք ընկալում: Թույլ տվեք սրտանց շնորհակալություն հայտնել տարածաշրջանից եվրոպացի քաղաքացիներին տարհանման գործընթացում ցուցաբերած աջակցության համար, շատ շնորհակալ եմ:

Հյուսիսում և հարավում ընթացող պատերազմների պայմաններում Հարավային Կովկասով անցնող առևտրային ուղիները դառնում են առավել կարևոր, քան երբևէ: Փոխվարչապետ Գրիգորյանի հետ միասին դիտարկեցինք, թե որտեղ կարող ենք բարելավել ենթակառուցվածքները՝ Եվրոպայի և Ասիայի միջև փոխադրումների ժամանակն ու ծախսերը նվազեցնելու համար: 2022 թվականից ի վեր բեռնափոխադրումների ծավալը քառապատկվել է»,- նշել է Կոսը։

Նա ներկայացրել է ԵՄ-ի աջակցությունը ՀՀ տնտեսությանը՝ անդրադառնալով ներդրումային ոլորտներին և նշել, որ այսօր ստորագրվել է ՀՀ-ի համար 140 մլն եվրոյի ֆինանսական աջակցություն։

«Այս միջոցները, ի թիվս այլ ուղղությունների, կնպաստեն այն բարեփոխումներին, որոնք անհրաժեշտ են վիզաների ազատականացման գործընթացքում առաջընթաց գրանցելու համար:

Վերջապես, սա կարևոր տարի է նաև հայկական ժողովրդավարության համար: Հունիսին Հայաստանում կկայանան ընտրություններ: Եվրոպայի տարբեր երկրներում մենք ամեն օր տեսնում ենք, թե ինչպես են չարամիտ դերակատարները փորձում խաթարել ժողովրդավարական գործընթացները, կիբերհարձակումների, ապատեղեկությունների և այլ միջամտությունների միջոցով:

Եվրոպան այստեղ է աջակցելու համար: Մենք կաջակցենք Հայաստանին հիբրիդային սպառնալիքների և ապատեղեկատվության դեմ պայքարում, որպեսզի հայերը, ՀՀ քաղաքացիները կարողանան ազատ և արդար պայմաններում քվեարկել և ինքնուրույն որոշել իրենց երկրի ապագան»,- եզրափակել է Եվրահանձնակատար Մարթա Կոսը։