Իրանը զգուշացնող հայտարարությամբ, կոչով դիմել է մի շարք պետությունների

Թեհրանի կոչ է արել պետություններին՝ թույլ չտալու իրենց ներգրավվածությունը պատերազմում: Իրանը զգուշացրել է Ռումինիային և հայտարարել, որ քաղաքական և իրավական արձագանք կտա, եթե Ռումինիան թույլ տա ԱՄՆ-ին իր տարածքում գտնվող ռազմաբազաներն օգտագործել Իրանի դեմ գործողությունների համար։ Այդ մասին, ըստ Iran International-ի, հայտնել է Իրանի ԱԳՆ ներկայացուցիչ Էսմայիլ Բաղաեին։

Նրա խոսքով՝ նման քայլը կդիտվի որպես մասնակցություն Իրանի դեմ ռազմական գործողություններին։ Բաղաեին նշել է, որ եթե Ռումինիան իր բազաները տրամադրի ԱՄՆ-ին, դա կհամարվի ռազմական ագրեսիայի մաս, ինչը, ըստ նրա, կհակասի միջազգային իրավունքին և կհանգեցնի միջազգային պատասխանատվության։

Ի պատասխան՝ Ռումինիայի արտաքին գործերի նախարարությունը հայտարարել է, որ երկիրը հակամարտության կողմ չէ։ Գերատեսչությունը հիշեցրել է, որ 2006 թվականին կնքված երկկողմ համաձայնագիրը ԱՄՆ-ին իրավական հիմք է տալիս օգտագործել Ռումինիայի տարածքում գտնվող որոշ ռազմական օբյեկտներ։

Ռումինիայի ԱԳՆ-ում նաև նշել են, որ երկրում արդեն ավելի քան տասը տարի գործում են հակահրթիռային պաշտպանության համակարգեր, որոնք ունեն բացառապես պաշտպանական նշանակություն և կիրառվում են ՄԱԿ-ի կանոնադրությանը համապատասխան՝ ինքնապաշտպանության նպատակով։ Նախարարությունը հավելել է, որ հակամարտության սկզբից առաջնահերթությունը դիվանագիտական ջանքերն ու լարվածության նվազեցումն է։