Եթե Իրանը պարտություն կրի, ապա դա կանդրադառնա նաև Հայաստանի վրա․ դեսպան

Իմ կարծիքով այս ագրեսիան ու գործողությունները անմիջականորեն վտանգում են տարածաշրջանային անվտանգությունն ու խաղաղությունը: Այս մասին մամլո ասուլիսի ժամանակ ասել է Հայաստանում Իրանի դեսպան Խալիլ Շիրղոլամին՝ անդրադառնալով փորձագետների ու իրանագետների շրջանում առկա մտահոգություններին՝ տարածաշրջանում հնարավոր լարվածության, Հայաստանին սպառնացող վտանգների իրատեսական լինելու մասին հարցին:

«Գործողություների շարունակականությունը տարածաշրջանում գտնվող բոլոր երկրների համար կստեղծվի ոչ բարենպաստ պայմաններ: Մեր բարեկամ և հարևան Հայաստանի Հանրապետության անվտանգությունը մեզ համար չափազանց կարևոր է, ՀՀ-ի տարածքային ամբողջականությունը մեզ համար կարմիր գիծ է»,- նշել է նա:

Խալիլ Շիրղոլամին շեշտել է՝ իրենց ցանկությունն է, որ Հայաստանը երբեք որևէ վնաս չկրի միջազգային օրենքները խախտողների գործողությունների հետևանքով:

Նրա խոսքով՝ եթե Իրանը պարտություն կրի, ապա դա կանդրադառնա նաև Հայաստանի վրա։