Էլեկտրոնային ծխախոտը՝ օրգանների անբավարարության պատճառ

Էլեկտրոնային ծխախոտի կանոնավոր օգտագործումը կարող է լուրջ առողջական հետևանքների հանգեցնել, ներառյալ՝ օրգանների անբավարարություն։ Այս մասին վկայում է նոր հետազոտությունը, որի արդյունքները ներկայացվել են գիտական շրջանակներում։

Հետազոտության համաձայն՝ վեյփ օգտագործողների մոտ  50 տոկոսով ավելի հաճախ են արձանագրվում ծանր վարակներ և քրոնիկ օբստրուկտիվ թոքային հիվանդություն։ Վերջինս առաջադեմ հիվանդություն է, որը կարող է հանգեցնել շնչառական անբավարարության և այլ օրգանների աշխատանքի խանգարման։ Նշվում է, որ ախտորոշումից հետո հիվանդների կյանքի տևողությունը հաճախ չի գերազանցում 10 տարին։

Գիտնականները նաև արձանագրել են, որ էլեկտրոնային ծխախոտները թուլացնում են թոքերի իմունային պաշտպանությունը, բարձրացնում ծանր վարակների հավանականությունը և նպաստում շնչուղիների բորբոքմանը։ Բացի այդ, արձանագրվել է լնդերի և ատամների վիճակի վատթարացում։

Փորձագետները նշում են, որ ռիսկայնության մակարդակով վեյփերը համադրելի են ավանդական ծխախոտի հետ և խորհուրդ են տալիս ամբողջությամբ հրաժարվել ծխելուց՝ առողջական բարդություններից խուսափելու համար։