Opel ավտոարտադրող ընկերությունը հետ է կանչում 900 հազար մեքենա
Opel ավտոարտադրող ընկերությունը հայտարարել է 900 հազար մեքենայի հետկանչի մասին ամբողջ աշխարհում՝ վարորդի անվտանգության բարձիկի անկանոն գործարկման վտանգի պատճառով։ Խնդիրը վերաբերում է մի շարք մոդելների, որոնք արտադրվել են 2005-ից 2017 թվականներին։
Հետկանչը ներառում է Signum, Meriva, Astra, Cascada, Mokka, Vectra և Zafira մոդելները։ Ընկերությունը նախատեսում է իրականացնել անհրաժեշտ տեխնիկական ստուգումներ և, անհրաժեշտության դեպքում, փոխարինել համապատասխան բաղադրիչները։
Գերմանական լրատվամիջոցների փոխանցմամբ՝ նույն խնդրի պատճառով 2013 թվականից ի վեր արդեն հետ է կանչվել մոտ 5,9 միլիոն Opel ավտոմեքենա։ Նշվում է, որ ընթացիկ քայլը շարունակությունն է նախկինում իրականացված միջոցառումների։
Ավտոարտադրողը կոչ է անում նշված մոդելների սեփականատերերին հետևել պաշտոնական ծանուցումներին և դիմել սպասարկման կենտրոններ՝ անհրաժեշտ աշխատանքների իրականացման համար։
