Փաշինյան–Ալիև հանդիպումը մեկնարկվեց․ մանրամասներ

Աբու Դաբիում մեկնարկել է Հայաստանի Հանրապետության վարչապետ Նիկոլ Փաշինյանի և Ադրբեջանի Հանրապետության նախագահ Իլհամ Ալիևի հանդիպումը։ Տեղեկությունը հայտնել է ՀՀ վարչապետի մամուլի խոսնակ Նազելի Բաղդասարյանը։

Տարածված տեսանյութի համաձայն՝ հայկական պատվիրակության կազմում հանդիպմանը մասնակցում են փոխվարչապետ Մհեր Գրիգորյանը, Անվտանգության խորհրդի քարտուղար Արմեն Գրիգորյանը, արտաքին գործերի նախարար Արարատ Միրզոյանը և Ազգային ժողովի փոխխոսնակ Ռուբեն Ռուբինյանը։

Ադրբեջանական կողմը ներկայացված է փոխվարչապետ Շահին Մուստաֆաևի, արտաքին գործերի նախարար Ջեյհուն Բայրամովի, նախագահի օգնական Հիքմեթ Հաջիևի և հատուկ հանձնարարությունների գծով նախագահի ներկայացուցիչ Էլչին Ամիրբեկովի մասնակցությամբ։

Հիշեցնենք, որ վարչապետ Նիկոլ Փաշինյանը տիկին Աննա Հակոբյանի հետ աշխատանքային այցով գտնվում է Արաբական Միացյալ Էմիրություններում։ Փետրվարի 4-ին վարչապետը Աբու Դաբիում կմասնակցի «Զայեդ» մարդկային եղբայրության 2026 թվականի մրցանակաբաշխությանը։