ՄԻՊ ներկայացուցիչներն այցելել են «Արմավիր» և «Գորիս» ՔԿՀ-ներ․ անցկացվել են առանձնազրույցներ

Մարդու իրավունքների պաշտպան Անահիտ Մանասյանի հանձնարարությամբ հունվարի 29-ին և 30-ին ՄԻՊ ներկայացուցիչներն այցեր են կատարել ՀՀ ԱՆ «Արմավիր» և «Գորիս» քրեակատարողական հիմնարկներ։

ՄԻՊ-ից հայտնում են, որ այցերի ընթացքում ազատությունից զրկված անձանց հետ անցկացվել են առանձնազրույցներ։ Քննության են առնվել նրանց իրավունքների ապահովման վիճակը, այդ թվում՝ առողջության պահպանման հետ կապված հարցերը, ինչպես նաև անհրաժեշտ փաստաթղթերն ու պահման պայմանները։ Հավելենք՝ ազատությունից զրկված անձանց բարձրացրած հարցերը քննարկվել են քրեակատարողական հիմնարկների վարչակազմերի հետ։

«Արդյունքները կամփոփվեն, և արձանագրված խնդիրների վերաբերյալ անհրաժեշտ պարզաբանումներ կպահանջվեն իրավասու մարմիններից։ Ազատությունից զրկված անձանց իրավունքներին վերաբերող հարցերը գտնվում են Մարդու իրավունքների պաշտպանի անմիջական ուշադրության ներքո։ Պաշտպան Անահիտ Մանասյանի և ՄԻՊ աշխատակազմի այցերը քրեակատարողական հիմնարկներ շարունակական են»,- նշված է ՄԻՊ-ի տարածած հաղորդագրությունում։