Չինաստանի «կոշտ» բողոքի նոտան՝ ԱՄՆ գործողությունների դեմ

Չինաստանի Արտաքին գործերի նախարարությունն իր խիստ դժգոհությունն ու վճռական բողոքն է հայտնում չինական ընկերությունների աշխատակիցների անհիմն ձերբակալությունների և հարցաքննությունների վերաբերյալ։ ԱԳՆ պաշտոնական ներկայացուցիչ Լին Ցզյանը հայտարարել է, որ վերջին շրջանում ԱՄՆ իրավապահ մարմինները հաճախակի ենթարկել են չինական ընկերությունների աշխատակիցներին երկարատև և չհիմնավորված հարցաքննությունների, ձերբակալությունների և արտաքսումների՝ ԱՄՆ մուտք գործելիս։

Նրա խոսքով՝ արձանագրվել են մի շարք դեպքեր, երբ չինացի քաղաքացիները առանց հստակ հիմնավորումների պահվել են սահմանային կետերում և ենթարկվել իրավական տեսանկյունից կասկածելի գործողությունների։ Լին Ցզյանը նշել է, որ նման մոտեցումը համակարգային բնույթ է ստացել։

Չինաստանի ԱԳՆ ներկայացուցիչը ընդգծել է, որ ԱՄՆ իրավապահների կիրառած մեթոդները կոպտորեն խախտում են չինացի քաղաքացիների օրինական իրավունքներն ու շահերը։ Նրա գնահատմամբ՝ այդ գործողությունները բացասաբար են անդրադառնում նաև երկու երկրների միջև նորմալ գործարար շփումների և համագործակցության մթնոլորտի վրա։

Պեկինը կոչ է արել ԱՄՆ-ին վերանայել իր գործելակերպը, ապահովել օտարերկրյա քաղաքացիների նկատմամբ օրենքի շրջանակում վերաբերմունք և ստեղծել կանխատեսելի պայմաններ երկկողմ տնտեսական ու գործարար հարաբերությունների համար։

«Չինաստանը վճռական բողոք է հայտնում այս կապակցությամբ», - ասել Է դիվանագետը: