Ադրբեջանը պատրաստ է խաղաղության պայմանագրին՝ պայմանով․ պատգամավոր

Ադրբեջանը կարող է խաղաղության պայմանագիր ստորագրել Հայաստանի հետ մինչև այս տարվա հունիսը՝ Հայաստանի հերթական ընտրություններից առաջ։ Այդ մասին հայտնել է Ադրբեջանի Միլլի Մեջլիսի պատգամավոր Գուդրաթ Հասանգուլիևը՝ խորհրդարանի հերթական նիստի ընթացքում, փոխանցում է APA լրատվական գործակալությունը։

Պատգամավորի խոսքով՝ պայմանագրի ստորագրման համար անհրաժեշտ է, որ Հայաստանը պարտավորվի՝ իր նոր Սահմանադրությունում չներառել որևէ տարածքային պահանջ Ադրբեջանի նկատմամբ։ Նա հիշեցրել է, որ Ադրբեջանի օրենսդրության համաձայն՝ հայ-ադրբեջանական պատերազմը ճանաչված է որպես «Հայրենական պատերազմ», և այդ պատճառով խաղաղության պայմանագրի ստորագրումը պահանջում է Միլլի Մեջլիսի համաձայնությունը։

Հասանգուլիևը նշել է, որ անցած տարվա օգոստոսին խաղաղության պայմանագիրը նախաստորագրվել է, և այժմ անհրաժեշտ է այն քննարկել խորհրդարանում։ Նա առաջարկել է հարցը ներառել Միլլի Մեջլիսի գարնանային նստաշրջանի աշխատանքային օրակարգում։

Պատգամավորը նաև անդրադարձել է տարածաշրջանային հաղորդակցությունների թեմային՝ նշելով, որ ներկայումս բեռները Հայաստան են տեղափոխվում Ադրբեջանի տարածքով, իսկ Ադրբեջանը վառելիք է մատակարարում Հայաստանին։ Նրա կարծիքով՝ այդ պայմաններում հնարավոր է նաև ադրբեջանական բեռների փոխադրումը Հայաստանի տարածքով, ինչպես նաև երկաթուղային հաղորդակցության վերականգնումը, այդ թվում՝ Սադարաք–Երևան գծի։ Նա հավելել է, որ քննարկվում է նաև մինչև մարտ Թուրքիա–Հայաստան ճանապարհների բացման հարցը, իսկ Նախիջևանի զարգացման համար անհրաժեշտ է ապահովել բեռնափոխադրումներ Հայաստանի տարածքով անցնող երկաթուղով։