Հիշում եմ, թե ինչպես էր Նիկոլ Փաշինյանը գնում Լեռնային Ղարաբաղ և պարում. Զախարովա
Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան տարակուսանք է հայտնել ՀՀ վարչապետ Նիկոլ Փաշինյանի հայտարարությունների վերաբերյալ, թե իբր ՀԱՊԿ գործընկերները 2022 թվականի սեպտեմբերին չեն կատարել իրենց պարտավորությունները Երևանի նկատմամբ։
Այս դիտարկումները մեկնաբանելով ամենշաբաթյա ճեպազրույցի ընթացքում՝ Մարիա Զախարովան նշել է, որ չի հասկանում, թե ինչ «որոշման» կամ ում գործողությունների մասին է խոսքը։ Նրա խոսքով՝ նման հայտարարությունները նմանվում են անհիմն պնդումների ամբողջության և պահանջում են պարզաբանում։
«Նա ՀԱՊԿ-ին է մեղադրո՞ւմ հայկական պետականության ոչնչացման մեջ։ Ինձ համար տարօրինակ է լսել այս ամենը։ Հնարավոր է՝ մեջբերումը սխալ էր, եկեք պարզաբանենք»,- ասել է Զախարովան։
Նա ընդգծել է, որ համատեքստից դատելով՝ Փաշինյանի հայտարարությունները վերաբերում էին Լեռնային Ղարաբաղի շուրջ ստեղծված իրավիճակին, սակայն նշել է, որ չի հիշում որևէ իրավական որոշում, որով այդ տարածքը ճանաչված լիներ որպես Հայաստանի Հանրապետության մաս։
«Հիշում եմ, թե ինչպես էր Նիկոլ Փաշինյանը գնում այնտեղ և պարում, դա է, ինչ ես հիշում եմ։ Բայց ես ոչինչ չգիտեմ այս տարածքի՝ Հայաստանի կազմում իրավական ճանաչման կամ ներառման մասին»,- ասել է նա։
Զախարովան հավելել է, որ առանց մեղադրանքների համատեքստի և առարկայի հստակ ըմբռնման անհնար է իմաստալից մեկնաբանություն տալ։ Նրա խոսքով՝ ձևակերպումներն ու փաստերը հստակեցնելուց հետո ռուսական կողմը պատրաստ կլինի ներկայացնել համապատասխան բացատրություններ և մեկնաբանություններ։
