Խորհրդականը հայտնել է` ինչքան պարգևավճար է ստացել Աննա Վարդապետյանը
Լրատվականներից մեկն այսօր հրապարակել է «Վարդապետյանը 8 մլն դրամի պարգևավճա՞ր է ստացել. դատախազությունը թաքցնում է գումարի իրական չափը» վերնագրով հոդված, որում մանիպուլացվել է Դատախազության պաշտոնական պատասխանը։ Պաշտոնական պարզաբանման մեջ նշվում էր, որ ՀՀ դատախազության համակարգում գործող բոլոր աշխատակիցները՝ ինքնավար և հայեցողական պաշտոններ զբաղեցնող անձինք, քաղաքացիական ծառայողները և տեխնիկական սպասարկում իրականացնող անձինք, 2025 թվականի դեկտեմբերին խրախուսվել են մեկ ամսվա պաշտոնային դրույքաչափով՝ «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» ՀՀ օրենքին համապատասխան։
Այս մասին «Արմենպրես»-ի հետ զրույցում հայտնել է ՀՀ գլխավոր դատախազի խորհրդական Լուսինե Մարտիրոսյանը՝ հավելելով, որ ՀՀ գլխավոր դատախազ Աննա Վարդապետյանը 2025 թվականի դեկտեմբերին որպես պարգևավճար ստացել է 1 միլիոն 894 հազար 300 դրամ։
