Սպասվում է ԱՄՆ փոխնախագահի այցը Հայաստան և Ադրբեջան
ԱՄՆ նախագահ Դոնալդ Թրամփը սոցիալական մեդիայում հայտարարել է, որ փետրվարին փոխնախագահ Վենսը նախատեսում է այցելել Հայաստան և Ադրբեջան՝ տարածաշրջանային խաղաղության գործընթացը խթանելու համար։
Թրամփը շնորհակալություն է հայտնել Ադրբեջանի նախագահ Իլհամ Ալիևին և Հայաստանի վարչապետ Նիկոլ Փաշինյանին՝ իր նախագահության օրոք ձեռք բերված խաղաղության պայմանագրի պահպանման համար՝ ընդգծելով․
«Սա ծանր պատերազմ էր, բայց այժմ մենք ունենք բարգավաճում և խաղաղություն»:
Նա հավելել է, որ Վենսի այցի նպատակն է խորացնել երկու երկրների հետ հարաբերությունները և ամրապնդել ԱՄՆ-ի մասնակցությունը տարածաշրջանի տնտեսական ու ռազմավարական ծրագրերում։ Թրամփը նշել է, որ նախատեսվում է խաղաղ միջուկային համագործակցության համաձայնագիր Հայաստանի հետ, ինչպես նաև նոր գործարքներ՝ ամերիկյան կիսահաղորդչային արտադրության ոլորտում։
Բացի այդ, ըստ Թրամփի, Ադրբեջանին կներկայացվեն ԱՄՆ-ում արտադրված պաշտպանական սարքավորումներ՝ ներառյալ զրահաբաճկոններ և նավեր։
