Ռուս-ուկրինական պատերազմը կարող էր ավարտվել օգոստոսին․ Reuters

Ուկրաինայի և Ռուսաստանի ներկայացուցիչները այսօր Աբու Դաբիում մեկնարկող բանակցությունների ընթացքում նախատեսում են կենտրոնանալ տարածքային հարցերի վրա։ Կողմերի փոխանցմամբ՝ քննարկումները կտևեն երկու օր և կներառեն Դոնբասի շուրջ առկա տարաձայնությունները, որոնք շարունակում են մնալ հակամարտության կարգավորման հիմնական խոչընդոտներից մեկը։ Այս մասին գրում է Reuters գործակալությունը։ 

Ուկրաինայի նախագահ Վոլոդիմիր Զելենսկին հայտնել է, որ առաջիկա բանակցություններում տարածքային հարցը առաջնահերթ է լինելու։ Նրա խոսքով՝ Դոնբասի հարցը կքննարկվի Ուկրաինայի, Ռուսաստանի և ԱՄՆ-ի մոտեցումների համատեքստում։ Բանակցությունները նախատեսվում է սկսել ուրբաթ երեկոյան և շարունակել շաբաթ առավոտյան։

Ռուսաստանի նախագահ Վլադիմիր Պուտինը պնդում է, որ Ուկրաինան պետք է զիջի Դոնեցկի մարզի այն հատվածը, որը դեռ գտնվում է Կիևի վերահսկողության տակ։ Խոսքը մոտ 5 հազար քառակուսի կիլոմետր տարածքի մասին է, ինչը, ըստ Մոսկվայի, խաղաղ համաձայնության կարևոր պայման է։ Ուկրաինայի ղեկավարությունը հրաժարվում է քննարկել այն տարածքների փոխանցումը, որոնք ռուսական ուժերը չեն կարողացել վերահսկողության տակ առնել պատերազմի ընթացքում։

Կրեմլի խոսնակ Դմիտրի Պեսկովը հայտարարել է, որ Դոնբասի հարցում Ուկրաինայի զիջումը Ռուսաստանի համար սկզբունքային պայման է։ Մոսկվան նաև հղում է անում «Անքորիջի բանաձևին», որը, ռուսական կողմի պնդմամբ, ենթադրում է Դոնբասի ամբողջական վերահսկողություն Ռուսաստանի կողմից և այլ ուղղություններով ճակատային գծերի սառեցում։

Դոնեցկը այն չորս շրջաններից մեկն է, որոնք Ռուսաստանը 2022 թվականին հայտարարել է իր կազմում ընդգրկված՝ հանրաքվեներից հետո, որոնք Կիևը և արևմտյան երկրները չեն ճանաչել։