Գազայում իսրայելական հարվածների հետևանքով զոհված լրագրողների թիվը հասել է 260-ի

Գազայում Պաղեստինի կառավարության տվյալներով՝ իսրայելական հարվածների հետևանքով զոհված լրագրողների ընդհանուր թիվը հասել է 260-ի։ Ցուցանիշը աճել է այն բանից հետո, երբ այսօր օդային հարվածի արդյունքում զոհվել են ևս երեք լրատվամիջոցների ներկայացուցիչներ։

Գազայի կառավարության Մեդիա գրասենյակի հաղորդմամբ՝ վերջին հարվածի հետևանքով մահացել են լրագրողներ Աբդուրրաուֆ Սամիր Շաաթը, Մուհամմադ Սալահ Քիշտան և Անաս Աբդուլլա Գունեյմը, որոնք համագործակցել են տարբեր լրատվամիջոցների հետ։ Պաղեստինյան կողմը պնդում է, որ խոսքը նպատակային հարվածի մասին է։

Գազայի իշխանությունները դիմել են Լրագրողների միջազգային ֆեդերացիային, Արաբ լրագրողների ֆեդերացիային և միջազգային մեդիա կառույցներին՝ կոչ անելով արձագանքել լրագրողների նկատմամբ իրականացվող գործողություններին և քայլեր ձեռնարկել պատասխանատուներին միջազգային դատարաններում պատասխանատվության ենթարկելու ուղղությամբ։ 

Ավելի վաղ Գազայի առողջապահության նախարարության ղեկավար Մունիր ալ-Բարշը հայտնել էր, որ երեք լրագրողները զոհվել են Գազա քաղաքի հարավում իրականացված ավիահարվածի հետևանքով։ Պաղեստինյան աղբյուրների պնդմամբ՝ 2023 թվականի հոկտեմբերի 8-ից սկսված հարձակումների ընթացքում զոհվել է ավելի քան 71 հազար պաղեստինցի, ավելի քան 171 հազարը՝ վիրավորվել, իսկ քաղաքացիական ենթակառուցվածքների զգալի մասը վնասվել է։ Նույն աղբյուրների տվյալներով՝ հոկտեմբերի 10-ին հայտարարված հրադադարից հետո ևս գրանցվել են հարվածներ և մարդասիրական մատակարարումների սահմանափակումներ։