Ղազախստանի նախագահը Թրամփից հրավեր է ստացել միանալու Գազայի խաղաղության խորհրդին
Ղազախստանի նախագահ Կասիմ-Ժոմարտ Տոկաևը ԱՄՆ նախագահ Դոնալդ Թրամփից հրավեր է ստացել միանալու Գազայի խաղաղության խորհրդին, հայտարարել է նախագահի մամուլի քարտուղար Ռուսլան Ժելդիբայը։
«Այո, նախագահ Կասիմ-Ժոմարտ Տոկաևը առաջին համաշխարհային առաջնորդներից մեկն էր, որը պաշտոնական հրավեր ստացավ միանալու Խաղաղության խորհրդին, և որպեսզի Ղազախստանը դառնա հիմնադիր պետություններից մեկը։ Ի պատասխան՝ պետության ղեկավարը նամակ է ուղարկել ԱՄՆ նախագահին՝ հայտնելով անկեղծ երախտագիտություն և հաստատելով իր համաձայնությունը միանալու այս նոր կազմակերպությանը», - ասել է Ժելդիբայը, ըստ ղազախական Tengrinews լրատվական կայքի։
Թրամփը նախկինում հայտարարել էր Գազայի խաղաղության խորհրդի ստեղծման մասին և խոստացել շուտով հրապարակել դրա անդամներին։ Խորհրդի կազմում են ԱՄՆ պետքարտուղար Մարկո Ռուբիոն, Թրամփի հատուկ դեսպանորդ Սթիվ Վիտկոֆը, ամերիկացի առաջնորդի փեսան և ներդրող Ջարեդ Քուշները, Մեծ Բրիտանիայի նախկին վարչապետ Թոնի Բլեյրը, Համաշխարհային բանկի նախագահ Աջայ Բանգան և ԱՄՆ ազգային անվտանգության հարցերով խորհրդականի տեղակալ Ռոբերտ Գաբրիելը, շաբաթ օրը հայտնել է Սպիտակ տունը։
