Հայաստանից մշակութային արժեքների արտահանման համար պետական նոր տուրք կսահմանվի
Կառավարություն իր այսօրվա նիստում որոշում կայացրեց, որով Հայաստանից մշակութային արժեքների արտահանման համար պետական նոր տուրք կսահմանվի։
Այդ նպատակով համապատասխան փոփոխություններ կկատարվեն «Պետական տուրքի մասին» ՀՀ օրենքում, որպեսզի հնարավոր լինի ամբողջությամբ ընդգրկել ԵԱՏՄ մաքսային օրենսդրության շրջանակում սահմանված մշակութային արժեքների մաքսային գործառնությունները։
Նախագծի ընդունման արդյունքում տուրքի տեսակները կհամապատասխանեցվեն հաստատված ԵԱՏՄ կարգերին, ինչպես նաև ակնկալվում է բարձրացնել վարչարարության արդյունավետությունը։
«Օրենսդրական փոփոխությունների ընդունումը նաև պայմանավորված է Հայաստանի համար կարևոր նշանակություն ունեցող մշակութային արժեքների արտաքին առևտուրը, ինչպես նաև արտահանումը և ներմուծումը կանոնակարգելու անհրաժեշտությամբ»,- ասված է նախագծի հիմնավորման մեջ։
Նշվում է, որ հիմա տարանջատված չեն մշակութային արժեքների արտահանման բնագավառում մաքսային ռեժիմները։ Այս նախագծով այդ տարանջատումը հնարավոր կլինի իրականացնել։
