ԱՄՆ-Իրան լարվածությունը խորանում է․ Թրամփը հրաժարվում է հուշագրից, Չինաստանը կոչ է անում բանակցել

 Չինաստանը կոչ է արել ԱՄՆ-ին և Իրանին կատարել արդեն ստորագրված փոխըմբռնման հուշագիրը և տարաձայնությունները կարգավորել երկխոսության ու բանակցությունների միջոցով։

Չինաստանի ԱԳՆ պաշտոնական ներկայացուցիչ Մաո Նինը ճեպազրույցի ժամանակ անդրադարձել է Վաշինգտոնի և Թեհրանի միջև ռազմական գործողություններին և այսօր նոր թափ առած հարվածներին։

«Մենք կոչ ենք անում ԱՄՆ-ին և Իրանին պատշաճ կերպով կատարել արդեն ստորագրված փոխըմբռնման հուշագիրը, երկխոսության և բանակցությունների միջոցով կարգավորել տարաձայնությունները»,- ասել է Մաո Նինը։

Նա նշել է, որ Պեկինը հետևում է Մերձավոր Արևելքում տեղի ունեցող զարգացումներին՝ ընդգծելով, որ ռազմական գործողությունների վերսկսումը չի բխում կողմերից որևէ մեկի շահերից։

Չինաստանի ԱԳՆ ներկայացուցիչը հավելել է, որ ռազմական միջոցները «ոչ մի խնդիր չեն կարող լուծել»։

Միաժամանակ ԱՄՆ նախագահ Դոնալդ Թրամփը հայտարարել է, որ Իրանի հետ հակամարտությունը դադարեցնելու նպատակով ստորագրված փոխըմբռնման հուշագիրն այլևս ուժի մեջ չէ։

Թրամփը նշել է, որ հուշագիրը «ավարտված է» և հավելել, որ այլևս չի ցանկանում շփվել Թեհրանի հետ։

ԱՄՆ նախագահը նման հայտարարություն է արել Անկարայում՝ Թուրքիայի մայրաքաղաքում անցկացվող ՆԱՏՕ-ի գագաթնաժողովից առաջ։