Թրամփը սպառնացել է Իրանին ուժեղ հարվածներով
Լրագրողի հարցին, թե արդյոք իրեն մտահոգում է Իրանի հայտարարությունը, ըստ որի՝ ԱՄՆ-ի հարվածի դեպքում Իրանը ռազմական և առևտրային բազաները կհամարի օրինական թիրախներ, ԱՄՆ նախագահ Դոնալդ Թրամփը պատասխանել է, որ նման քայլի դեպքում կկիրառվեն ուժեղ հարվածներ։
«Եթե նրանք դա անեն, մենք նրանց կհարվածենք այնպիսի մակարդակներով, որոնք նրանք երբեք չեն զգացել։ Նրանք նույնիսկ չեն հավատա դրան։ Ես ունեմ տարբերակներ, որոնք շատ ուժեղ են»,- ասել է ԱՄՆ նախագահը:
Հիշեցնենք` ԱՄՆ նախագահ Դոնալդ Թրամփը հնարավոր միջամտության շրջանակում չի դիտարկում Իրանում ամերիկյան ռազմական զորախմբի տեղակայման տարբերակը։ Այդ մասին CNN հեռուստաալիքին հայտնել է Սպիտակ տան պաշտոնյան՝ մեկնաբանելով Վաշինգտոնի կողմից քննարկվող քայլերը Իրանում ստեղծված իրավիճակի ֆոնին։
