Վաշինգտոնը կհարվածի Մեքսիկայի տարածքում գործող նարկոկարտելներին. Թրամփ

ԱՄՆ նախագահ Դոնալդ Թրամփը հայտարարել է, որ Վաշինգտոնը կարող է անցնել Մեքսիկայի տարածքում գործող նարկոկարտելների դեմ հարվածների՝ ցամաքում։ Fox News-ին տված հարցազրույցում նա նշել է, որ ԱՄՆ-ին հաջողվել է ծովային ուղիներով իրականացվող թմրանյութերի մաքսանենգության շուրջ 97 տոկոսը կասեցնել, և այժմ ուշադրությունը կենտրոնանում է ցամաքային ուղղության վրա։

Թրամփի խոսքով՝ նարկոկարտելներն իրական ազդեցություն ունեն Մեքսիկայում տեղի ունեցող գործընթացների վրա։ Նա ընդգծել է, որ ստեղծված իրավիճակը մտահոգիչ է և ցավալի՝ խոսելով հարևան երկրում անվտանգության և կառավարման խնդիրների մասին։ ԱՄՆ նախագահի պնդմամբ՝ նարկոկարտելների գործունեության հետևանքով Միացյալ Նահանգներում տարեկան զոհվում է շուրջ 253 հազար մարդ։

Թրամփի հայտարարություններին արձագանքել է Մեքսիկայի նախագահ Կլաուդիա Շեյնբաումը։ Նա լրագրողների հետ զրույցում նշել է, որ Մեքսիկան պատրաստ է խորացնել համագործակցությունը ԱՄՆ-ի հետ նարկոկարտելների դեմ պայքարում։ Շեյնբաումի փոխանցմամբ՝ նա երկրի արտաքին գործերի նախարար Խուան Ռամոն դե լա Ֆուենտեին խնդրել է հանդիպում կազմակերպել ԱՄՆ պետքարտուղար Մարկո Ռուբիոյի հետ՝ երկկողմ համագործակցության հնարավոր ուղղությունները քննարկելու նպատակով։