Որևէ կառավարություն մշակույթի համար այնքան չի արել, որքան այս կառավարությունը․ Անդրեասյան
Պատմության թանգարանի ցուցանմուշների ցուցադրությունն Ակրոպոլիսում անցկացնելու վերաբերյալ պայմանավորվածություն է ձեռք բերվել։ Այս մասին հայտարարել է Կրթության, գիտության, մշակույթի և սպորտի նախարար Ժաննա Անդրեասյանը՝ արտագնա մամուլի ասուլիսի ժամանակ։
Նրա խոսքով՝ նախատեսվում է ցուցահանդես անցկացնել՝ Բեռլինի թանգարանի հետ համագործակցությամբ: Նշելով Երևանում Ջենիֆեր Լոպեսի համերգի հսկայական հաջողությունը, որին մասնակցելու համար ժամանել էր ավելի քան 15 հազար օտարերկրացի, նախարարը հայտնել է մեկ այլ աստղի մասնակցությամբ այդ հաջողությունը կրկնելու մտադրության մասին. թե ով է լինելու այդ աստղը՝ դեռևս հայտնի չէ: Միևնույն ժամանակ, պատասխանելով այն հարցին, թե որքան միջոցներ են վերադարձվել բյուջե՝ Լոպեսի համերգի համար ծախսված հսկայական գումարի փոխարեն, նախարարը հստակ թիվ չի հայտնել՝ նշելով, որ արդյունքները դեռ վերլուծվում են:
Որևէ կառավարություն մշակույթի համար այնքան չի արել, որքան այս կառավարությունը. համոզված է Ժաննա Անդրեասյանը՝ մատնանշելով թատրոնների շենքային պայմանների վերանորոգումն ու տեխնիկական հագեցվածության ապահովումը: Նրա խոսքով՝ շահել են նաև թանգարանները, որոնք կառավարության ծրագրի շնորհիվ կարողացել են կրկնապատկել ստացված եկամուտները: Նախարարը դրական է արտահայտվել ամանորյա տոների ընթացքում թանգարանների աշխատանքային փորձի մասին. ըստ նրա՝ հունվարի 1-ին և 2-ին գործող 4 թանգարաններում ավելի քան 700 այցելու է եղել: Նա նաև հայտնել է պատմության ու ճարտարապետության հուշարձանների, ինչպես նաև եկեղեցիների վերականգնման շարունակական գործընթացի մասին:
