Արևմուտքը բացարձակապես ամոթալի իրավիճակներ է թույլ տվել. Լավրով

Արևմուտքը բազմակողմ միջոցառումների ընթացքում բացարձակապես ամոթալի իրավիճակներ է թույլ տվել՝ փորձելով հաստատել Ռուսաստանի «մեկուսացումը», ինչը վերջիվերջո հանգեցրել է Արևմուտքի ինքնամեկուսացմանը։ Այդ մասին «Ցանկությունների տոնածառ» միջոցառման ժամանակ տված հարցազրույցում հայտարարել է Ռուսաստանի արտգործնախարար Սերգեյ Լավրովը, փոխանցում է TASS-ը։

«Մեզ մոտ ամենաակտիվ կերպով շարունակում է զարգանալ դիվանագիտությունը այն երկրների ուղղությամբ, որոնց մենք հիմա անվանում ենք համաշխարհային մեծամասնություն՝ Ասիա, Աֆրիկա, Լատինական Ամերիկա: Եվ այն մեկուսացումը, որի մասին պնդում է Արևմուտքը, իրականում հենց այդ նույն արևմտյան աշխարհի ինքնամեկուսացումն է: Եղել են միանգամայն ամոթալի իրավիճակներ, երբ միջազգային միջոցառումների ժամանակ, օրինակ՝ «Մեծ քսանյակի» շրջանակներում, նրանք պայմանավորվում էին ձեռք չմեկնել ռուս ներկայացուցիչներին: Երբ մեզ տեսնում էին նիստերի դահլիճի հարևանությամբ գտնվող ինչ-որ միջանցքներում, ձևացնում էին, թե նայում են հակառակ ուղղությամբ․ չափահաս մարդիկ փախչում էին», — ասել է ՌԴ արտգործնախարարը։