Անդրեասյանը խոսել է «Ակադեմիական քաղաքի» նախապատրաստական աշխատանքներից
ԿԳՄՍ նախարար Ժաննա Անդրեասյանը հաշվետու ասուլիսի ժամանակ հայտնել է, որ նախարարության ամենակարևոր անելիքը «Ակադեմիական քաղաք» ծրագիրն է։ Նրա խոսքով՝ 2025 թվականը առանցքային է եղել նաև այս առումով, քանի որ Ազգային ժողովը ընդունել է բարձրագույն կրթության և գիտության նոր օրենքը, որն ուժի մեջ է մտել նախորդ տարվա հոկտեմբերի 20-ին և օրենսդրորեն ամրագրում է «Ակադեմիական քաղաքի» կարգավորումները։ Միաժամանակ նա նշել է, որ նախորդ տարին կարևոր է եղել նաև «Ակադեմիական քաղաքի» շուրջ նախապատրաստական աշխատանքները հանգրվանին հասցնելու տեսանկյունից։
«Գլխավոր հատակագծի մեր օրենսդրության համապատասխան սահմանված փաթեթը պատրաստված է և ներկայացված է հաստատման: Առաջիկայում կարծում եմ, որ համապատասխան ընթացակարգերով այն կհաստատվի: Մեծ ծավալի աշխատանք ենք իրականացրել տեղում՝ տարածքի մաքրման առումով: Ասեմ, որ Ակադեմիական քաղաքի տարածքում ընթանում են պեղումներ, և պետք է ասեմ, որ առաջին արդյունքները բավականին հետաքրքիր են, և ներշնչում են տպավորություն, որ Ակադեմիական քաղաքում կարող է լինել նաև պատմամշակութային ժառանգության հրաշալի ներկայություն»,- ասել է նախարարը։
Անդրադառնալով «Ակադեմիական քաղաքում» իրականացվող աշխատանքներին՝ Ժաննա Անդրեասյանը նշել է, որ ծրագրի շրջանակում արձանագրվել են էական զարգացումներ, և աշխատանքները շարունակվում են։ «Մենք էական զարգացում ենք ապրել այն աշխատանքներում, որոնք բովանդակային առումով ծրագիրը տանում են առաջ: Տարբեր ուղղություններով նախագծերը պրոցեսի մեջ են՝ առաջիկայում կանդրադառնանք ծրագրի ներդրումային բաղադրիչին: Անելիքները բազմաթիվ են, քանի որ մեծ ծավալի օրենսդրական աշխատանք ենք կատարել»,- ասել է նա։
