Պուտինը ցանկանում է՝ դա տեղի ունենա․ նա շատ հստակ ասաց, և ես հավատում եմ նրան․ Թրամփ

Ֆլորիդայում երեք ժամ տևած բանակցություններից հետո ԱՄՆ-ի և Ուկրաինայի նախագահներ Դոնալդ Թրամփը և Վլադիմիր Զելենսկին հայտարարել են, որ Ռուսաստանի հետ խաղաղության հասնելու ուղղությամբ զգալի առաջընթաց են գրանցել: Այս մասին հայտնում է The New York Times-ը։

Թերթի պնդմամբ՝ գլխավոր հարցը մնում է չլուծված. Պուտինը պահանջում է Դոնբասը, Զելենսկին դեմ է, իսկ Թրամփը պնդում է համաձայնագրի արագ ստորագրում:

Նշվում է, որ խաղաղության համաձայնագրի պարամետրերը շատ ավելի պարզ կլինեն։

Ռուսաստանը Դոնբասի շրջանների պատկանելության հարցը համարում է գերակա խնդիր: ՌԴ նախագահ Վլադիմիր Պուտինը կոչ է արել ԱՄՆ նախագահին հետևել Անքորիջում նրանց միջև ձեռք բերված «փոխըմբռնումներին», չնայած այդ ժամանակ որևէ էական համաձայնության մասին չէր հայտարարվել: Նրա օգնական Յուրի Ուշակովը բարձրաձայնել է Ռուսաստանի հիմնական պահանջը. Կիևը պետք է կայացնի «համարձակ, պատասխանատու քաղաքական որոշում Դոնբասի վերաբերյալ»:

Ուկրաինայի նախագահ Վլադիմիր Զելենսկին էլ իր հերթին նշել է, որ այս հարցը պետք է լուծի Ուկրաինայի ժողովուրդը։

Թրամփը չի բացառել անկանխատեսելի խնդիրների առաջացման հնարավորությունը։ Նա ասել է, որ խաղաղության ծրագրի ցանկացած կետ «կարող է շատ կարևոր լինել» և խաթարել ամբողջ համաձայնագիրը։

Սպիտակ տան ղեկավարի պնդմամբ՝ մոտ ապագայում բավականին հավանական է ԱՄՆ-ի, Ուկրաինայի և Ռուսաստանի միջև եռակողմ հանդիպումը. «Պուտինը ցանկանում է, որ դա տեղի ունենա։ Նա ինձ շատ հստակ ասաց, և ես հավատում եմ նրան»։