Իրանի ԱԳՆ-ն Հայաստանի վերաբերյալ հայտարարություն է արել
ISNA գործակալության հաղորդմամբ՝ Իրանի արտաքին գործերի նախարարության ներկայացուցիչ Իսմայիլ Բաղաին պատասխանել է Sputnik-ի թղթակցի հարցին, որը վերաբերում էր Հայաստանի վարչապետի հայտարարությանը՝ Թեհրանի և Երևանի միջև հարաբերությունների զարգացմանն աջակցելու և Իրանի հետ ռազմավարական գործընկերության մասին փաստաթուղթ ստորագրելու ցանկության վերաբերյալ։
Հարցում, մասնավորապես, նշվել է. «Հաշվի առնելով, որ Հայաստանը 2025 թվականին Ռազմավարական գործընկերության համաձայնագիր է ստորագրել ԱՄՆ-ի, այնուհետև Եվրոպական միության հետ և մասամբ դուրս է եկել Հավաքական անվտանգության պայմանագրի կազմակերպությունից, ինչպես նաև հաշվի առնելով Եվրամիության և ԱՄՆ-ի հետ Իրանի խնդիրները պատժամիջոցների ոլորտում, արդյո՞ք Իրանը պատրաստ է Հայաստանի հետ ստորագրել ռազմավարական գործընկերության համաձայնագիր, որը նման է Ռուսաստանի և Չինաստանի հետ իր համաձայնագրերին»։
Ի պատասխան՝ Բաղաին հայտարարել է. «Իրանը իր հարաբերությունները կարգավորում է ազգային շահերից ելնելով, և Հայաստանի հետ հարաբերությունները բացառություն չեն այս կանոնից։ Հայաստանի հետ մեր հարաբերությունները հիմնված են փոխադարձ շահերի, խնդիրների և ընդհանրությունների ճշգրիտ ընկալման վրա, մենք շատ լավ հարաբերություններ ունենք այս երկրի հետ և վճռական ենք շարունակելու այդ հարաբերությունները տարբեր ոլորտներում»։
Նա նաև ընդգծել է, որ Իրանը հարգում է այն փաստը, որ երկրները հարաբերություններ ունեն այլ կողմերի հետ, եթե դա չի վնասում Իրանի հարաբերություններին և շահերին։
«Մեր հարաբերություններն այլ երկրների հետ ձևավորվում են փոխադարձ շահերի և խնդիրների մանրակրկիտ վերլուծության հիման վրա, և Հայաստանի և հարևան մյուս երկրների հետ մեր հարաբերությունները կարգավորվում են այդ հիմքի վրա»,- հավելել է Իրանի արտաքին գործերի նախարարության ներկայացուցիչ Իսմայիլ Բաղաին։
