ՄԱԳԱՏԷ-ն պահանջում է մուտք Իրանի օբյեկտներ

Միջուկային էներգիայի միջազգային գործակալությունը (ՄԱԳԱՏԷ) շարունակում է պնդել Իրանի միջուկային օբյեկտներին լիարժեք մուտք ունենալու անհրաժեշտությունը՝ դրանց անվտանգության և իրական վիճակի վերաբերյալ Թեհրանի հայտարարությունները ստուգելու համար։ Այդ մասին «ՌԻԱ Նովոստի»-ին տված հարցազրույցում հայտարարել է ՄԱԳԱՏԷ-ի գլխավոր տնօրեն Ռաֆայել Գրոսսին։

Նրա խոսքով՝ Իրանի միջուկային ծրագիրը չի սահմանափակվում միայն այն երեք օբյեկտներով, որոնց մասին հաճախ է խոսվում միջազգային հարթակներում։ Թեև այդ օբյեկտները կարևոր դեր ունեն ուրանի վերամշակման, կոնվերսիայի և հարստացման գործընթացներում, Իրանի միջուկային ենթակառուցվածքը շատ ավելի լայն է։

Գրոսսին նշել է, որ Իրանը ունի զարգացած միջուկային ծրագիր՝ ընդգրկելով գիտահետազոտական նշանակալի բաղադրիչ և բազմաթիվ այլ օբյեկտներ երկրի տարածքում։ Դրանց թվում է նաև «Բուշեր» ատոմակայանը, ինչպես նաև նոր ատոմային էլեկտրակայանների կառուցման ծրագրեր։

ՄԱԳԱՏԷ-ի ղեկավարը հավելել է, որ գործակալությունը շարունակում է աշխատանքը բոլոր ուղղություններով՝ անկախ այն հայտարարություններից, ըստ որոնց Իրանի միջուկային օբյեկտները իբր ոչնչացված են։ Նրա խոսքով՝ վերահսկողությունն ու ստուգումները մնում են գործակալության առաջնային գործառույթներից։