Շենգավիթ վարչական շրջանում կկառուցվի անտուն շների կացարան
«Սուրբ Աստվածամայր» բժշկական կենտրոնում 2023թ. սկսած լայնածավալ վերանորոգման և վերազինման աշխատանքներ են իրականացվել: Ընդհանուր առմամբ վերանորոգվել է շուրջ 3900 քմ տարածք: Ծրագիրը հնարավորություն է տվել էապես բարելավել մատուցվող ծառայությունների որակը և ապահովել անվտանգ ու հարմարավետ միջավայր՝ քաղաքացիների ու անձնակազմի համար:
***
Շենգավիթ վարչական շրջանի Արցախի պողոտա 4-րդ նրբանցք 12 տարածքում կկառուցվի թափառող /անտուն շների կացարան: Երևանում հայտարարվել է թափառող շների համար նախատեսված առաջին պետական կացարանի շինարարության մրցույթը: Կացարանի նախագիծը կազմվել է հաշվի առնելով միջազգային հաջողված փորձը:
***
Ավան վարչական շրջանում կկառուցվի 6 խմբանի նոր մանկապարտեզ: Շինաշխատանքները նախատեսված են իրականացնել 2026թ. Երևան համայնքի բյուջեով: Եռահարկ շենքն ամբողջությամբ համալրված է լինելու օդափոխության և ջեռուցման համակարգերով: Տանիքում տեղադրվելու են արևային ֆոտովոլտային և արևային ջրատաքացուցիչ համակարգեր: Շենքում նախատեսվում է տեղադրել հակահրդեհային ահազանգման և հրդեհաշիջման ինքնաշխատ համակարգեր: Բակում նախատեսված է կառուցել ոռոգման համակարգ, նոր ճանապարհ, սիզամարգեր, մայթեր, մանկական խաղահրապարակներ:
***
Ալբերտ Ազարյանի անվան մարմնամարզության նոր մարզադպրոցի կառուցման աշխատանքներն ընթանում են սահմանված ժամանակացույցով: Միջազգային չափանիշներին համապատասխանող կենտրոնում հարմարավետ պայմաններ կապահովվեն շուրջ 300 պատանի և երիտասարդ մարզիկների համար: Համալիրում հնարավոր կլինի անցկացնել նաև միջազգային մրցաշարեր՝ ամրապնդելով Հայաստանի դիրքը և հեղինակությունը մարմնամարզության և սպորտի աշխարհում։
Նոր համալիրը նաև կհյուրընկալի 2027թ. Հայաստանում առաջին անգամ անցկացվելիք Մարմնամարզության Եվրոպայի առաջնությունը՝ լիարժեք ենթակառուցվածքային պատրաստվածությամբ։
***
Երևանում ավարտվել են միջին նորոգման աշխատանքները: Ծրագրի շրջանակներում աշխատանքներ են իրականացվել՝ Արաբկիր վարչական շրջանի Վաղարշյան, Հրաչյա Քոչար, Գյուլբենկյան փողոցներում, Նոր Նորք վարչական շրջանի Գայի պողոտայում և Գայի պողոտա-Մյասնիկյան պողոտա տրանսպորտային հանգույցի էջքերում, Էրեբունի վարչական շրջանի Էրեբունի փողոցում, Մալաթիա- Սեբաստիա վարչական շրջանի Անդրանիկի փողոցում, Իսակովի պողոտա և Սեբաստիա փողոցի տրանսպորտային հանգույցի էջքերում, Դավթաշեն վարչական շրջանի Սասնա Ծռեր փողոցի և Եղվարդի խճուղու տրանսպորտային հանգույցի էջքերում:
Ասֆալտապատման աշխատանքներին զուգահեռ իրականացվել են նաև դիտահորերի և հեղեղատարների փոխարինման և նիշերի ուղղման աշխատանքներ:
***
Կառուցապատվող շինարարական օբյեկտներում պատասխանատու ստորաբաժանումների աշխատակիցները շարունակում են շրջայցեր իրականացնել, որի շրջանակում կառուցապատողները նախազգուշացվում են շինարարական հրապարակները պատշաճ կազմակերպելու և կահավորելու համար:
Կան կառուցապատողներ, որոնք արդեն իսկ կազմակերպել են նշված պահանջների կատարումը, մասնավորապես՝ «Անիպրեմիում Դիվելոփմենթ», «Ռենշին», «Գյուրջյան այգիներ», «Օրդ Դիվելոփմենթ», «Մլ Մայնինգ», «Կամ Դիվելոփմենթ» ՍՊ ընկերությունները և «Լույսեր» ՓԲ ընկերությունը։
***
Ծիծեռնակաբերդի խճուղու ճանապարհի հիմնական փլուզված հատվածը կառուցապատող «Սահակյան Շին» ՓԲԸ-ի կողմից ամբողջությամբ վերականգնվել է, և ներկայումս ապահովված է նշված ճանապարհի երկու երթևեկելի գոտիներով տրանսպորտային միջոցների անցանելիությունը։ Նշված ճանապարհի լիովին շահագործումը հնարավոր կլինի հարակից տարածքում ընթացող շինարարական աշխատանքների ավարտին զուգընթաց։
