Թրամփը Թուրքիայում արժանացել է «A+» մակարդակի պաշտոնական դիմավորման

Թուրքիայի նախագահ Ռեջեփ Թայիփ Էրդողանը երեքշաբթի Անկարայի նախագահական համալիրում պաշտոնական այցի շրջանակում ԱՄՆ նախագահ Դոնալդ Թրամփին դիմավորել է բարձրագույն «A+» մակարդակի պաշտոնական արարողությամբ, հաղորդում է Anadolu-ն։

Նախագահական համալիրին մոտենալիս Թրամփի շարասյանը դիմավորել են հեծելազորային ստորաբաժանումները, որոնք նրան ուղեկցել են մինչև արարողակարգային դարպասներ։

Էրդողանն անձամբ ողջունել է ամերիկացի առաջնորդին համալիրի գլխավոր մուտքի մոտ։ Այն բանից հետո, երբ երկու նախագահները զբաղեցրել են իրենց տեղերը արարողության հրապարակում, զինվորական նվագախումբը կատարել է Թուրքիայի և ԱՄՆ-ի պետական հիմները։

Արարողությանը մասնակցել են պատմական 16 թյուրքական պետությունները ներկայացնող դրոշակակիրներն ու զինծառայողները, զինվորական նվագախումբը, ինչպես նաև ենիչերիների համազգեստով զինվորներ։ Բացի դրանից, ի պատիվ այցի, տրվել է 21 հրետանային համազարկից բաղկացած հրավառություն։

Թրամփը Թուրքիայի նախագահական գվարդիայի գնդի պատվո պահակախմբին ողջունել է թուրքերեն «Merhaba asker» («Բարև, զինվոր») խոսքերով։

Արարողության ավարտից հետո Էրդողանն ու Թրամփը սեղմել են միմյանց ձեռքը Թուրքիայի և ԱՄՆ-ի դրոշների առջև գտնվող աստիճանների վրա և լուսանկարվել մամուլի ներկայացուցիչների համար։

ԱՄՆ նախագահի ժամանման ընթացքում նախագահական համալիրի երկնքում սավառնել է Թուրքիայի ռազմաօդային ուժերի Turkish Stars բարձրագույն պիլոտաժի խումբը՝ իրականացնելով թռիչք ամերիկյան դրոշի գույներով՝ կարմիր, կապույտ և սպիտակ ծխային հետքերով։

Արարողությանը մասնակցել են նաև մի քանի պատվավոր ստորաբաժանումներ, դրանց թվում՝ «Մեհթեր» զինվորական նվագախումբը, Նախագահական գվարդիայի գնդի պատմական պատվո պահակախումբը, որի կազմում ներառված են ավանդական տարազներով և իրենց դրոշներով պատմական 16 թյուրքական պետությունների ներկայացուցիչները, ինչպես նաև օսմանյան պատմական ստորաբաժանումը։

Բարձրագույն «A+» մակարդակի պաշտոնական արարողությունն առաջին անգամ անցկացվել է 2025 թվականի ապրիլի 10-ին՝ Ինդոնեզիայի նախագահ Պրաբովո Սուբիանտոյի այցի ժամանակ։

Դոնալդ Թրամփը դարձավ պետության երկրորդ ղեկավարը, որին Թուրքիայում դիմավորեցին նման մակարդակի արարողակարգով։