Վրաստանում ձերբակալվել են Հայաստանի, Գերմանիայի, Ղազախստանի քաղաքացիներ՝ թմրանյութերի առևտրին օժանդակելու մեղադրանքով
Վրաստանում ձերբակալվել են երեք օտարերկրացիներ՝ թմրանյութերի առևտրին օժանդակելու մեղադրանքով, հայտնում են երկրի ՆԳՆ-ից։
Մեղադրյալները Ղազախստանի 20-ամյա, Հայաստանի 47-ամյա և Գերմանիայի 47-ամյա քաղաքացիներ են։
Ձերբակալությունները տեղի են ունեցել այն բանից հետո, երբ պարեկային ոստիկանությունը կանգնեցրել է նրանց Քոբուլետիում և Բաթումում՝ ստուգման համար։ Մեղադրյալների անձնական զննման, մեքենաների և բնակության վայրերի խուզարկությունների արդյունքներով՝ առգրավվել են հատկապես խոշոր չափերի թմրանյութեր և հոգեմետ նյութեր՝ մետադոնի, հերոինի, ալֆա-ПВП-ի, բուպրենորֆինի և պրեգաբալինի տասնյակ փաթեթներ, որոնք պատրաստվել էին վաճառքի համար։ Նյութեղեն այլ ապացույցներից են չափաբաժինների փաթեթավորման նյութերը։
Գործով քննությունը շարունակվում է։ Մեղադրյալներին սպառնում է 20 տարվա ազատազրկում կամ անժամկետ բանտարկություն։
