ԱՄՆ-ն պատրաստվում է թուլացնել պատժամիջոցները Բելառուսի դեմ
Միացյալ Նահանգները հայտարարել է, որ մտադիր է վերացնել բելառուսական կալիում արտադրողների նկատմամբ կիրառված պատժամիջոցները, ինչը դիտարկվում է որպես Վաշինգտոնի և Մինսկի միջև հարաբերությունների հնարավոր ջերմացման հերթական ազդակ։ Այդ մասին հաղորդում է Associated Press-ը։
Նշվում է, որ Բելառուսի հարցերով ԱՄՆ հատուկ դեսպանորդ Ջոն Քոուլը նախատեսում է այցելել Բելառուսի մայրաքաղաք Մինսկ, որտեղ հանդիպում կունենա երկրի ղեկավար Ալեքսանդր Լուկաշենկոյի հետ։
Բելառուսը, որը համարվում է Ռուսաստանի մերձավոր դաշնակից, երկար տարիներ գտնվել է Արևմուտքի մեկուսացման և բազմակի պատժամիջոցների ներքո։ Մոտ 9,5 միլիոն բնակչություն ունեցող երկիրը Ալեքսանդր Լուկաշենկոն ղեկավարում է ավելի քան երեք տասնամյակ՝ կենտրոնացված իշխանության պայմաններում։
Արևմտյան երկրները Բելառուսի նկատմամբ պատժամիջոցներ են կիրառել ինչպես մարդու իրավունքների խախտումների, այնպես էլ 2022 թվականին Ուկրաինա ներխուժելու համար Մոսկվային իր տարածքը տրամադրելու պատճառով։
