Պենտագոնի ղեկավարը կասկածվում է ռազմական հանցագործության մեջ
Պենտագոնի ղեկավարը կասկածվում է ռազմական հանցագործության մեջ։
The Washington Post-ը հղում անելով իր աղբյուրներին գրում է, որ ԱՄՆ պաշտպանության նախարար Փիթ Հեգսեթը բանավոր հրաման է տվել «սպանել բոլորին»՝ ԱՄՆ-ի կողմից թմրանյութեր տեղափոխող նավի վրա առաջին հարվածի ժամանակ (սեպտեմբերի 2-ին)։
Առաջին հրթիռային հարվածից հետո նավի վրա գտնվող 11 մարդկանցից երկուսը ողջ են մնացել: ԱՄՆ ռազմական անօդաչու թռչող սարքերը հայտնաբերել են նրանց՝ կառչած նավի բեկորներից։ Այնուհետև ռազմական գործողության հրամանատարը հրամայել է իրականացնել երկրորդ հարվածը, որը դարձել է փրկվածների մահվան պատճառ:
Որոշ փորձագետներ նման հարվածները համարում են անօրինական, քանի որ թմրանյութերի ապօրինի շրջանառությունը ԱՄՆ-ի համար անմիջական ռազմական սպառնալիք չի ներկայացնում։
Նախկին ռազմական փաստաբան Թոդ Հանթլին ասում է, որ նույնիսկ եթե ԱՄՆ-ն պատերազմ է մղում թմրանյութերի ապօրինի շրջանառություն կատարող անձանց դեմ, նրանց սպանության հրամանը կհամարվի ռազմական հանցագործություն։ Դեմոկրատ կոնգրեսական Սեթ Մուլթոնը, նախկին ծովային հետևակային, համաձայն է։ Նրա խոսքով՝ ամերիկացիները վաղ թե ուշ պատասխանատվության կենթարկվեն կամ ռազմական հանցագործությունների, կամ սպանության համար։
Մինչ օրս ԱՄՆ-ի կողմից թմրանյութեր տեղափոխելու կասկածանքով նավերի վրա կատարված հարվածների հետևանքով զոհվել է ավելի քան 80 մարդ։
