ԱՄՆ պաշտոնյաներից գաղտնի են պահվել Ռուսաստանի հետ բանակցությունները

ԱՄՆ պաշտոնյաները միշտ չէ, որ տեղյակ են եղել ԱՄՆ նախագահի հատուկ բանագնաց Սթիվ Ուիթկոֆի և Ռուսաստանի ուղղակի ներդրումների հիմնադրամի ղեկավար Կիրիլ Դմիտրիևի բանակցությունների մանրամասներին: Այս մասին հայտնում է The Wall Street Journal-ը՝ հղում անելով իր աղբյուրներին:

WSJ-ի զրուցակիցների խոսքով՝ Կիրիլ Դմիտրիևի և Սթիվ Ուիթկոֆի բանակցությունները տևել են 9 ամիս: Ընդ որում, ԱՄՆ ֆինանսների նախարարության պատժամիջոցների վերահսկողության բաժնի պաշտոնյաները հաճախ են այդ հանդիպումների մանրամասները իմացել բրիտանացի գործընկերներից։

Ալյասկայում ՌԴ-ի եւ ԱՄՆ-ի օգոստոսյան գագաթնաժողովի նախաշեմին Կիրիլ Դմիտրիեւը եւ Սթիվ Ուիթկոֆը քննարկել են բանտարկյալների հնարավոր փոխանակումը, հայտնել են WSJ-ի աղբյուրները: Նրանց խոսքով՝ ԿՀՎ-ն և ԱՄՆ Պետդեպարտամենտը լիարժեք տեղեկացված չեն եղել փոխանակման շուրջ բանակցությունների մասին։

Նոյեմբերի 26-ին Bloomberg գործակալությունը հրապարակել է ՌԴ և ԱՄՆ Ներկայացուցիչների հեռախոսազրույցների երկու սղագրություն: Գործակալությունը պնդում է, որ դրանցից մեկը Սթիվ Ուիթկոֆի եւ ՌԴ նախագահի օգնական Յուրի Ուշակովի խոսակցության ձայնագրությունն է, երկրորդը՝ Կիրիլ Դմիտրիեւի եւ Ուշակովի: «Կոմերսանտ»- ի հետ զրույցում Ռուսաստանի նախագահի օգնականը հայտարարել է, որ արտահոսքը դժվար թե տեղի ունենա զրույցի մասնակիցներից: Իր հերթին Դմիտրիեւը Յուրի Ուշակովի հետ զրույցի սղագրությունը ֆեյք է անվանել։