Թրամփի առաջարկած խաղաղության ծրագիրը պետք է վերանայվի․ Մակրոն

Ֆրանսիայի նախագահ Էմանուել Մակրոնը RTL ռադիոկայանին տված հարցազրույցում նշել է, որ ԱՄՆ նախագահ Դոնալդ Թրամփի առաջարկած խաղաղության ծրագիրը անհրաժեշտ է բարելավել, որպեսզի այն համապատասխանի Ուկրաինայի և եվրոպական երկրների ակնկալիքներին։ Նրա խոսքով՝ նախաձեռնությունը շարժվում է խաղաղության ուղղությամբ, սակայն ծրագրի առանձին կետեր պահանջում են քննարկում և ճշգրտում։

«Սա նախաձեռնություն է, որը գնում է ճիշտ ուղղությամբ՝ դեպի խաղաղություն։ Այնուամենայնիվ, այդ ծրագրի որոշ ասպեկտներ ենթակա են քննարկման, բարելավման»,– ասել է Մակրոնը։

«Մենք ուզում ենք խաղաղություն, բայց մենք չենք ուզում խաղաղություն, որը գործնականում կապիտուլյացիա է»,- ասել է նա։

Մակրոնը հավելել է, որ տարածքային զիջումների վերաբերյալ որոշումները կարող են ընդունել միայն ուկրաինացիները։ Նրա խոսքով՝ ծրագիրը ցույց է տալիս, թե ինչն է ընդունելի Ռուսաստանի համար, սակայն դա չի նշանակում, որ Ուկրաինան կամ եվրոպական երկրները պետք է այն ընդունեն։

«Արդյո՞ք դա նշանակում է, որ ուկրաինացիներն ու եվրոպացիները պետք է հենց դա ընդունեն։ Պատասխանն է՝ ոչ»,– ընդգծել է նա։

Ֆրանսիայի նախագահը նաև նշել է, որ Ռուսաստանի հետ հնարավոր խաղաղության դեպքում Ուկրաինայի առաջին պաշտպանական գիծը պետք է լինի իր բանակի վերականգնումը, որը, ըստ նրա, չի կարող ենթարկվել սահմանափակումների։