Ոստիկանների համար նախատեսվում է արտոնյալ հիփոթեքային վարկային ծրագիր․ ՆԳՆ
ՆԳ նախարարությունը մշակել է օրենսդրական նախաձեռնություն, որով ոստիկանության ծառայողները կկարողանան օգտվել մատչելի հիփոթեքային վարկավորման պետական ծրագրերից։
Ինչպես նշել է ՆԳ նախարարի տեղակալ Արմեն Մկրտչյանը «Լուրերի» եթերում, ծրագիրը հնարավորություն կտա ոստիկաններին բնակարան կամ տուն ձեռք բերել կամ կառուցել արտոնյալ պայմաններով։ Աջակցությունը կտրվի կանխավճարի փոխհատուցման և տոկոսադրույքների մարման ձևով։
Ծրագիրը կգործի ոստիկանության բոլոր ծառայողների համար՝ որոշակի առաջնահերթություններով՝ կախված բնակության վայրից, ծառայողական տարածքից և սոցիալական վիճակից։
Մկրտչյանի խոսքով՝ խնդիրը հատկապես նկատվել է Սյունիքի և Վայոց ձորի մարզերում, որտեղ ոստիկանները հաճախ նշանակվում են ոչ իրենց բնակավայրերում՝ շահերի բախումից և կոռուպցիոն ռիսկերից խուսափելու նպատակով։ Նման աջակցությունը կնպաստի ծառայողների բնակարանային պայմանների բարելավմանը և կբարձրացնի աշխատանքի արդյունավետությունը։
ՆԳ նախարարությունը նաև իրականացնում է մի շարք միջոցառումներ՝ Ոստիկանությունում ծառայությունը գրավիչ դարձնելու և համակարգը պրոֆեսիոնալ կադրերով համալրելու ուղղությամբ։
