Պակիստանը նախազգուշացրել է Աֆղանստանի իշխանություններին

Պակիստանի պաշտպանության նախարար Խուջաթ Ասիֆը հայտնել է, որ Ստամբուլում կայացած բանակցությունները Աֆղանստանի իշխանությունների հետ արդյունք չեն տվել։ Նրա խոսքով՝ կողմերը չեն կարողացել համաձայնության գալ անվտանգության հարցերում։

Ասիֆը ընդգծել է, որ Պակիստանը պատրաստ է պահպանել գործող հրադադարը, սակայն այն կշարունակվի միայն այն դեպքում, եթե Աֆղանստանի տարածքից այլևս չկատարվեն հարձակումներ։ Պաշտոնյան նշել է, որ իր երկրի զինված ուժերը լիովին պատրաստ են արձագանքել ցանկացած սպառնալիքի։

Հավելենք՝ վերջին ամիսներին Պակիստանի և Աֆղանստանի սահմանային գոտիներում կրկին աճել է լարվածությունը։ Իսլամաբադը պարբերաբար հայտարարում է, որ հարձակումների պատասխանատվությունը կրում են Աֆղանստանի տարածքում գործող զինյալ խմբավորումները։