Ռուսաստանից կարտաքսվի ավելի քան 4,300 օտարերկրյա քաղաքացի՝ «Անօրինական-2025» գործողության արդյունքում
Ինչպես հայտնել է վարչության տեղեկատվության և հասարակայնության հետ կապերի բաժնի պետ Տատյանա Պետրովան, գործողության նպատակն է եղել միգրացիոն ոլորտում իրավախախտումների հայտնաբերումն ու կանխումը։ Նրա խոսքով՝ երկու փուլով իրականացված միջոցառումների արդյունքում բացահայտվել է շուրջ 15,700 վարչական խախտում, որոնք վերաբերում են օտարերկրյա քաղաքացիների մնալու և աշխատանքային գործունեության կանոնների խախտմանը։
Ոստիկանները կազմել են ավելի քան 10,000 արձանագրություն՝ Ռուսաստանի Դաշնության Վարչական իրավախախտումների օրենսգրքի 18.8 հոդվածով (ՌԴ-ում գտնվելու կանոնների խախտում), և շուրջ 2,100 արձանագրություն՝ 18.10 հոդվածով (անօրինական աշխատանք): Բացի այդ, գործատուների նկատմամբ կազմվել է ավելի քան 1,600 արձանագրություն՝ օտարերկրյա աշխատուժի ապօրինի ներգրավման համար։
Գործողության ընթացքում հարուցվել է 748 քրեական գործ, որոնց մեծ մասը վերաբերում է կեղծ գրանցման (Քրեական օրենսգրքի 322.3 հոդված, 430 դեպք) և միգրացիոն փաստաթղթերի կեղծման (Քրեական օրենսգրքի 327 հոդված, 235 դեպք) դեպքերին։ Բացի այդ, արձանագրվել է 29 քրեական գործ՝ թմրամիջոցների ապօրինի շրջանառության, և 24 գործ՝ օտարերկրյա քաղաքացիների կողմից կատարված այլ հանցագործությունների վերաբերյալ։
