Չենք պատրաստվում մեր ողջ տնտեսությունը գամել սպառազինության ձեռքբերմանը. Պապիկյան
Մենք հույսը դնում ենք մեզ վրա, և, բնականաբար, այս համատեքստում կարծում ենք, որ խաղաղությունն այն ճանապարհն է, որը կչեզոքացնի ձեր կողմից նշված ռիսկերը: Այդ մասին ամփոփիչ ասուլիսի ժամանակ ասել է ՀՀ պաշտպանության նախարար Սուրեն Պապիկյանը՝ պատասխանելով հարցին, թե արդյոք ունե՞նք միջոցներ, որպեսզի պատերազմական իրավիճակում հանկարծակիի չգանք այն դեպքում, եթե դաշնակիցներն օգնության չհասնեն:
«Ինչ վերաբերում է զենքերին, դրանք տարբեր տեսակի են: Բնականաբար, պաշտպանողական են՝ սկսած տարբեր տեսակի, բազմազան ԱԹՍ-ներից մինչև սպառազինության այլ տեսակներ: Կարող եմ ասել, որ դրանք բավականին մրցունակ են, և արդեն իսկ առաջացնում են շատ երկրների հետաքրքրություն»,- ասել է նա:
Ինչ վերաբերում է սպառազինության մասով ծրագրերին, Պապիկյանը հայտարարել է. «Սպառազինումը շարունակվում է, պիտի շարունակվի, որովհետև առանց սպառազինության՝ պրոֆեսիոնալ բանակ հնարավոր չէ ունենալ»:
Անդրադառնալով պաշտպանական ոլորտի ծախսերին պաշտպանության նախարարը նշել է․
«Իմ տեղեկություններով՝ Ադրբեջանը ևս կրճատել է ծախսերը, բայց Ադրբեջանի ծախսերը իմ խնդիրը չեն, ես կխոսեմ մեր ծախսերի մասին: Ինչպես նշեցի՝ վերջին 3 տարիների ընթացքում էապես փոխվել է ԶՈՒ-ին հատկացվող դրամական միջոցների թիվը: Նշեցի՝ 2018 թվականի նկատմամբ այն կազմում է 1.1 մլրդ դոլար, այն պարագայում, երբ 2018 թվականին կազմել է 640 մլն-ի կարգի: Եթե համեմատության մեջ դնեք, կտեսնեք՝ ինչ էական փոփոխությունների մասին է: Մենք չենք պատրաստվում մտնել մրցավազքի մեջ և մեր ողջ տնտեսությունը գամել սպառազինության ձեռքբերմանը և, ըստ էության, տնտեսության քանդմանը»,- նշել է ՀՀ պաշտպանության նախարար Սուրեն Պապիկյանը։
