Խուդաթյանը՝ Երևանի մետրոյի նոր կայարանի կառուցման ժամկետների մասին
ՀՀ տարածքային կառավարման և ենթակառուցվածքների նախարար Դավիթ Խուդաթյանի խոսքով՝ 2026 թվականի պետական բյուջեով Երևանի մետրոպոլիտենի ենթակառուցվածքների նորոգման համար նախատեսվում է հատկացնել 2.5 միլիարդ դրամ։ ԱԺ-ում բյուջեի քննարկման ընթացքում նախարարը նշել է, որ նոր կայարանի կառուցման համար կտրամադրվի ևս 2 միլիարդ դրամ, իսկ ուղևորափոխադրման ծառայությունների կազմակերպման համար՝ 1 միլիարդ դրամ։
Ընդհանուր առմամբ՝ երեք ծրագրերի համար նախատեսված ֆինանսավորումը կկազմի 5.5 միլիարդ դրամ։ Նոր կայարանի շինարարությունը նախատեսվում է իրականացնել «Քաղաքային զարգացում ծրագրի» շրջանակում, որի ընդհանուր արժեքը 16.6 միլիարդ դրամ է։
Ծրագրի շրջանակում նախատեսվում է նաև Իսակով–Արշակունյաց ճանապարհահատվածի կառուցում՝ 7 միլիարդ դրամ բյուջեով։ Երևանի քաղաքապետարանի տվյալներով՝ մետրոյի «Աջափնյակի» կայարանի նախագիծը գտնվում է ավարտական փուլում, շինարարությունը կսկսվի 2025-ի վերջին կամ 2026-ի սկզբին։ Նախագծի ընդհանուր արժեքը գնահատվում է շուրջ 250 միլիոն դոլար, իսկ շինարարության տևողությունը՝ մինչև հինգ տարի։
