«Մեր ձևով»-ի խոսնակը՝ ԶԼՄ-ներով տարածված ձայնագրության մասին

24News-ը զրուցել է «Մեր ձևով» ժողովրդական շարժման խոսնակ Մարիաննա Ղահրամանյանի հետ՝ 2 ԶԼՄ-ներում տարածված ձայնագրության իսկությունը հերքելու խնդրի վերաբերյալ։

-Տիկի՛ն Ղահրամանյան, երկու օր առաջ գրառում էիք արել «Մեր ձևով» ժողովրդական շարժման անունից՝ 24 ժամ տալով երկու ԶԼՄ-ի հերքել տարածված ձայնագրության իսկությունը, հակառակ պարագայում` զգուշացրել էիք, որ հարցը իրավական ճանապարհով է լուծվելու: Արդյո՞ք եղել է հերքում: Եթե ոչ, ի՞նչ քայլեր եք ձեռնարկելու: Խնդրում եմ Ձեր մեկնաբանությունը:

- Արդեն տևական ժամանակ է՝ լրացել է իշխանությունների խոսափող հանդիսացող ԶԼՄ-ներին իրենց կողմից հրապարակված և շարժմանը զրպարտող տեղեկությունների հերքման համար սահմանված ժամկետը, սակայն վերոնշյալ պարբերականների կողմից որևէ հերքում այդպես էլ չի հրապարակվել։

Տեղեկացնում ենք, որ սահմանված ժամկետը լրանալուն պես համապատասխան փաստերը փոխանցվել են մեր փաստաբանական խմբին, որոնք ներկայում քայլեր են ձեռնարկում մեր խախտված իրավունքների պաշտպանությունն օրենքով սահմանված կարգով իրականացնելու համար։