ՌԴ–ից արցախցիներին ուղղվող օգնությունը պետք է համակարգվի մեզ հետ. Թորոսյան

ՌԴ պետական և հասարակական հատվածից Լեռնային Ղարաբաղից բռնի տեղահանված անձանց ուղղված աջակցությունը պետք է համակարգվի ՀՀ աշխատանքի և սոցիալական հարցերի նախարարության հետ։ Այդ մասին այսօր ասել է ՀՀ աշխատանքի և սոցիալական հարցերի նախարար Արսեն Թորոսյանը Ռուսաստանի Դաշնության արտակարգ և լիազոր դեսպան Սերգեյ Կոպիրկինի հետ հանդիման ժամանակ։ Տեղեկությունը հայտնում է նախարարության մամուլի ծառայությունը։

«ՌԴ պետական և հասարակական հատվածից Ղարաբաղից բռնի տեղահանված անձանց ուղղված աջակցությունը պետք է համակարգվի ԱՍՀ նախարարության հետ, որպեսզի օգնությունը ընտանիքներին բաշխվի առավել հասցեական»,– ասված է հաղորդագրության մեջ։

Հանդիպմանը Թորոսյանը անդրադարձել է նաև Ղարաբաղից բռնի տեղահանված անձանց սոցիալական աջակցության, բնակարանային ապահովության և զբաղվածության ծրագրերի ընթացքին։

Դեսպան Կոպիրկինն իր հերթին ընդգծել է աշխատանքի և սոցիալական պաշտպանության ոլորտում համագործակցության կարևորությունը և պատրաստակամություն հայտնել ներդնել հնարավոր ջանքեր երկկողմ հարաբերությունների զարգացման գործում։

Նշվում է, որ դեսպանի հետ քննարկվել են նաև աշխատանքի և սոցիալական պաշտպանության ոլորտում փոխադարձ հետաքրքրություն ներկայացնող մի շարք հարցեր. ընդգծվել է երկու երկրների միջև երկկողմ և բազմակողմ ձևաչափերով համագործակցության, մասնավորապես՝ ԱՊՀ-ի, ԵԱՏՄ-ի և ՄԱԿ-ի շրջանակում նախատեսված աշխատանքների կարևորությունը։

Հավելենք, որ Արցախից տեղահանված լայնածավալ ակցիան սկսվել է այս տարվա օգոստոսին, այդ ժամանակից ի վեր ընդհանուր առմամբ օգնություն է ստացել ավելի քան 3,3 հազար ընտանիք Հայաստանի տարբեր մարզերում: