Իսրայելի և ՀԱՄԱՍ-ի միջև բանակցությունները չեն նշանակում պատերազմի ավարտ. Ռուբիո
Իսրայելի և պաղեստինյան ՀԱՄԱՍ շարժման միջև բանակցությունները չեն նշանակում պատերազմի ավարտ և Գազայի հատվածի կառավարման մարմնի ստեղծումը որոշ ժամանակ կպահանջի՝ ասել է ԱՄՆ պետքարտուղար Մարկո Ռուբիոն NBC News-ում։
«Բոլորը, այդ թվում՝ Իսրայելը, համաձայնել են, որ, ի վերջո, այդ գործընթացի որոշակի պահին, Խաղաղության խորհրդի նման միջազգային կոնսորցիումի օգնությամբ, աջակցությամբ և ղեկավարությամբ, Գազայի հատվածը կկառավարի պաղեստինյան տեխնոկրատական խումբը, որը կապված չէ ՀԱՄԱՍ-ի հետ, ահաբեկչական չէ»,- հեռուստաընկերությանն ասել է Ռուբիոն։
Նա նաև ընդգծել է. «Հնարավոր չէ երեք օրում Գազայում ստեղծել կառավարման կառուցվածք, որը կապված չլինի ՀԱՄԱՍ-ի հետ»։
Ավելի վաղ ԱՄՆ նախագահ Դոնալդ Թրամփը մինչև կիրակի ժամանակ էր տվել ՀԱՄԱՍ շարժմանը, որպեսզի ընդունի Գազայում հրադադարի խաղաղ գործարքի վերաբերյալ իր պայմանները:
«Ազատ արձակեք բոլոր պատանդներին, այդ թվում՝ հանձնեք զոհվածների մարմինները։ ՀԱՄԱՍ-ի հետ համաձայնությունը պետք է ձեռք բերվի կիրակի օրը՝ Վաշինգտոնի ժամանակով երեկոյան ժամը 18:00-ին: Համաձայնագրին արդեն միացել են բոլոր երկրները։ Եթե այս վերջին առաջարկը չընդունվի, ՀԱՄԱՍ-ի դեմ աներևակայելի դժոխք կսկսվի»,- հոկտեմբերի 3-ին գրել է Թրամփը Truth Social սոցցանցում։
Նույն օրը ՀԱՄԱՍ-ը պատրաստակամություն է հայտնել քննարկել Թրամփի՝ Գազայի վերաբերյալ ծրագիրը:
