Ուկրաինան դեռևս չի կարողացել մեզ իրենց պատերազմի մեջ ներքաշել. Հունգարիայի ԱԳՆ
Հունգարիայի արտաքին գործերի նախարար Պետեր Սիյարտոն մերժել է իր ուկրաինացի գործընկեր Անդրեյ Սիբիհայի՝ Բուդապեշտի «բարոյական դեգրադացիայի» մասին դիտողությունները՝ որպես Հունգարիային պատերազմի մեջ ներքաշելու իր անհաջող փորձերի հետևանք։ Սիյարտոն կարծում է, որ Սիբիհայի խոսքերը արտացոլում են նրա հիասթափությունը ձախողումից։
«Ես հասկանում եմ Ուկրաինայի արտաքին գործերի նախարարի հիասթափությունը. նրանք դեռևս չեն կարողացել մեզ իրենց պատերազմի մեջ ներքաշել», - գրել է դիվանագետը Facebook-ում։
Սիյարտոն ընդգծել է, որ Հունգարիան չի միջամտի հարևան երկրների միջև հակամարտությանը, բայց կշարունակի պաշտպանել իր ազգային շահերը։
Ավելի վաղ Ուկրաինայի զինված ուժերի գլխավոր հրամանատար Ալեքսանդր Սիրսկին Վլադիմիր Զելենսկիին զեկուցել է, որ հունգարական անօդաչու թռչող սարքերը խախտել են Ուկրաինայի օդային տարածքը՝ սահմանամերձ շրջաններում արդյունաբերական ներուժը հետախուզելու համար։ Այնուհետև Զելենսկին հրամայել է վերանայել «բոլոր հասանելի տվյալները և անհապաղ զեկույց կազմել յուրաքանչյուր գրանցված փաստի վերաբերյալ»։ Հունգարիայի արտաքին գործերի նախարար Պետեր Սիյարտոն, ի պատասխան Ուկրաինայի այն պնդման, որ հունգարական անօդաչու թռչող սարքերը խախտել են երկրի օդային տարածքը, ասել է, որ Զելենսկին «խելագարվել է հակահունգարական տրամադրություններից»։
