Ալեն Սիմոնյանը՝ Վալոդյա Գրիգորյանի սպանության մասին
Այո՛, խնդիրներ կան, այո՛, իրավապահները պետք է հետևություն անեն և այո՛, դա խնդիր է, այն ինչ տեղի է ունեցել կատեգորիկ վատ բան է, դա մի դուռ է, որը բացել և նույնիսկ այդ դռանը մոտենալ չէր կարելի: Այս մասին ԱԺ-ում լրագրողների հետ զրույցում ասել է ԱԺ նախագահ Ալեն Սիմոնյանը՝ անդրադառնալով Փարաքարի համայնքապետ Վոլոդյա Գրիգորյանի սպանությանը:
«Շատ ցավում եմ, ևս մեկ անգամ ցավակցում եմ հարազատներին և համարում եմ, որ մեր իրավապահները պետք է առնվազն շատ արագ բացահայտեն»,- նշել է Ալեն Սիմոնյանը:
Սիմոնյանը բացառել է սպանության քաղաքական պատվեր լինելը:
«Մեր իշխանությանը շատ բաների մեջ կարելի է մեղադրել, բայց մենք ո՛չ մարդ ենք ծեծում, ո՛չ էլ մարդ ենք սպանում: Բացառում եմ, որ քաղաքական ենթատեքստ կարող է ունենալ: Շատ հարգանքով ենք մոտեցել ընտրություններին, հարգանքով ենք մոտեցել համայնքի ղեկավարին որպես անձ, որևիցե անախորժություն, քննարկում չի եղել: 99 տոկոս հավանականությամբ միջանձնային նախապատմություն ունեցող խնդիր է»,- ասել է ԱԺ նախագահը:
Հիշեցնենք՝ ավելի վաղ հայտնել էինք, որ սեպտեմբերի 23-ին՝ ժամը 23.52-ին, ոստիկանություն ահազանգ է ստացվել, որ Արմավիրի մարզի Մերձավան բնակավայրի Երևանյան խճուղում կրակոցներ են հնչել։ Կա 2 զոհ, 1 վիրավոր։ Մահացածներից մեկը համայնքի ղեկավար Վալոդյա Գրիգորյանն է։
