Չինաստանը կպաշտպանի իր շահերը՝ չնայած Ռուսաստանից նավթի ներմուծումը կանխելու ԱՄՆ ջանքերին
Չինաստանի իշխանությունները կպաշտպանեն իրենց երկրի օրինական շահերը՝ ի պատասխան ԱՄՆ նախագահ Դոնալդ Թրամփի՝ Ռուսաստանից միջազգային նավթի գնումները խոչընդոտելու փորձերի: Այս մասին հայտարարել է Չինաստանի արտաքին գործերի նախարարության խոսնակ Գո Ցզյակունը:
«Չինաստանը կձեռնարկի բոլոր անհրաժեշտ միջոցները, և մենք վճռականորեն կպաշտպանենք մեր օրինական իրավունքներն ու շահերը», - ընդգծել է նա։
Չինացի դիվանագետը պարզաբանել է, որ երկրների մեծ մասը, այդ թվում՝ Միացյալ Նահանգները և Եվրամիությունը, առևտրային հարաբերություններ են պահպանում Ռուսաստանի հետ։
«Չինական և ռուսական ընկերությունների միջև նորմալ գործարար հարաբերությունները և համագործակցությունը համապատասխանում են Առևտրի համաշխարհային կազմակերպության կանոններին և շուկայական սկզբունքներին։ Դրանք ուղղված չեն որևէ երրորդ կողմի դեմ և չպետք է ենթարկվեն որևէ միջամտության», - հավելել է Գո Ցզյակունը։
Պաշտոնական ներկայացուցչի խոսքով՝ Պեկինի դիրքորոշումը ուկրաինական ճգնաժամի վերաբերյալ, որի հետ ԱՄՆ իշխանությունները փորձում են կապել ռուսական նավթի գնումները, մնում է անփոփոխ։
